حلوة على شكل وردة مقلية و معمرة بالقشدة ـربيعة من القصر الكبير

09.11.2010

مقادير القشدة :

2 كيسان حليب
كاس قشدة طرية سائلة
كاس نشا
كاس طحين
كاس سكر
شوية فاني
(العبار بنفس الكاس اما كبير او صغير حسب المقدار اللي بغينا)

الطريقة :

نديرو المقادير في كسرونة و نخلط مزيان بالطراب اليدوي ثم نديروها فوق النار و نبقاو نحركو حتى يتماسك الخليط و يولي بحال الكريمة و نزولوها من فوق النار و نخليوها حتى تبرد

مقادير العجين :

2 كيسان و نصف دقيق
1 م ص خميرة الحلوى
قبصة ديال البيكاربونات
شوية الملح
شوية قرفة (او حبة حلاوة)
كاس ديال اللبن
شوية الفاني
بيضة
ماء ورد (اختياري)

الطريقة :

نخلط العناصر مزيان و نجمع العجينة باللبن ، ندلكوها جيدا (تكون بحال عجينة الكعب ) ثم نغطيها و نخليها تخمر مدة ساعة ثم نطلقها مزيان تكون رقيقة بحال ديال الكعب و من الاحسن نورقوها بالمكينة ثم نقطعوها ب 3 مراشم على شكل دوائر وحدة اكبر من وحدة او نستعمل كيسان (مثلا كاس ديال الشكلاط و كاس اخر اصغر منه و كاس ثالث اصغر منهم)
كنحط الدائرة الكبيرة و نديرو فوقها الدائرة المتوسطة و فوقها الدائرة الصغيرة و هكذا حتى نكمل كل حلوى فيها 3 دوائر من بعد نضغط عليهم من الوسط براس ملعقة باش يشدو فبعضهم ثم نحط كل وحدة في مقلاة فيها الزيت سخون باش تقلى وحنا ضاغطين عليها باش ماتحلش و باليد الاخرى نبقاو نخويو عليها الزيت حتى تشد الفورمة ديالها ثم نقلبوها على الجهة الاخرى و نكمل الباقي بنفس الطريقة كيجيو بحال شكل وردة نديرو الوريدات فوق الورق النشاف ثم نغطسوهم فالسيرو مزيان

تحضير السيرو :

كاس ماء + كاس سكر نخلطهم و نديروهم فوق النار حتى يدوب السكر و يغلي الخليط مزيان و يبدى يلصق في الملعقة هذا سيرو خاتر و الا بغيناه سيرو خفيف نديرو كاس سكر مع 2 كيسان ماء

ملي نزول الوردات من السيرو كنعمرو القلب ديال كل وردة (يعني الوسط ديالها) بالكريما اللي حضرنا من قبل و تزين بنصف حبة كرز (حب ملوك معسل) كتجي مثل الوردة تماما رائعة فالمنظر و المذاق و كتذوب فالفم