الدجاج محمر - par fatiha

اليوم غانقدم ليكم الدجاج محمر الي درت الاسبوع الفايت فواحد العرضة درتها.
المهم يتنقى الدجاج بالملحة وتحكيه بيها مزيان باش تحيد ديك الشحمة و دوك الزوايد الي فالدجاجة بسهووووووولة.
من بعد كاترقديه فالماء و الخل و سكينجبير و الملح.

كاتخليه يتسقطر مزيااااااااان.
دابا ندوزو للخليط الي غانرقدو فيه الدجاج,و لي كانحتاجو ليه:
البسيبيسة و النويورة

القزبور و معدنوس الي كاندقو فالمهراز

الثوم

السمن

حامض مصير

كيف ما كاتشوفو معايا المقادير كاملها مجموعة فهاد الطبسيل(زيت,الحامض,الخرقوم,الابزار,ضامة البنة,بسيبيسة والنويورة الي سخناها و طحناها,والقزبر الي وجدنا من قبل(الملحة ماكانديروهاش حيت رقدنا فيها الدجاج و درنا ضامة البنة)).

الخليط هاكدا كايولي

بامكانك هاد الخليط تطحنيه فخلاط كهربائي
بعدها كا ندهنو الدجاج مزيان بالخليط من برا و من الداخل ومانساوش تحت الجلدة

كانعقدو الدجاج ب 2 خيوط صحاح واحد غايجمع الفخيضات او واحد غايجمع الجوانح
وتخلي الدجاج يترقد اكبر فترة ممكنة
ايوة و ديريه يطيب فكاميلة تكون شوية كبيرة باش تخلي ليك الامكانية انك تحركيه بسهووولة بلا ما يتحل ليك
كانديرو البصلة و الزيت بعدها كانضيفو الما و الدجاج.
الدجاج كانحطوه اول شي على سدرو و نخليوه ديك نص ساعة و نقلبوه يطيب على الجهة الاخرى ديك نصف ساعة.

الاناء الي درتي فيه الدجاج يطيب ماعمرك تسديه لان هذا كاياثر على طياب وكايخلي الدجاج كايتحل بالزربة
ممكن تغطيه وتخلي الغطا مايل

فجهة اخرى كانديرو الكنصة و القلب ديال الدجاج مقطعين يطيبو بوحديهم فزويتة مع شوي د البصلة و الثوم

مانساوش الثوابل و الزيتون.والماء الي كانضيفو كانهزوه من الاناء فاش كايطيب الدجاج

كاندهنو الدجاج بالسمن وندخلوه يتحمر

ديك المرقة الي بقات لينا كانشدوها ونصفيوها ونحكو ديك البصلة فالصفاية باش تختر لينا لاصوص.
هادا الشكل النهائي

بالصحة مدو ايديكم الدار داركم

نتمنى نكون فدتكم

Comments

[cuisinebouchra]

iwa yalala kaychahi tbarkallah 3lik merci pour la recette gros bisous