اللحم بالروز - الكبيرة

المقادير
كيلو لحم (او دجاج)
نصف كيلو روز مغسول و منقوع في ماء ساخن ( = زلافة كبيرة)
4 بيضات مسلوقين و مقطعين رقاق اما دوائر او على الطول
ملح و ابزار و خرقوم و سكينجبير
شوية ثومة محكوكة
بصلة كبيرة مشلضة
شوية زيت الزيتون
كاس زيت لطياب الروز
ربطة ديال القزبر
معدنوس مقطع رقيق للتزيين

الطريقة
نديرو اللحم في طنجرة و نزيدو عليه الزيت البلدية و البصلة و الملح و التوابل و نخليوه يتشحر مزيان على نار مهيلة ثم نديرو الماء الكافي (ما نكتروش) و نرميو ربطة القزبور و نسدو عليه و نخليوه يطيب و يعقاد المرق و يختار
نشللو الروز و نصفيوه من الماء و نديروه في طنجرة +الضعف ديالو من الماء (زلافة روز نديرو ليها 2 زلايف ماء) و نديرو شوية الملح و شوية البزار و كاس ديال الزيت و نحركو بالملعقة و نسدو عليه يطيب على نار مهيلة و ينشف كيحتاج تقريبا من 10 الى 15 دقيقة
ناخدو مول داير او طنجرة صغيرة او أي حاجة تكون غارقة شوية و ندهنوها بالزيت و نرشوها كاملة بالمعدنوس و نستفو فوق المعدنوس طبقة ديال البيض مقطع دوائر او شرائح رقيقة (الى كانت الة تقطيع البيض احسن) و نديرو عليه الروز و نضغطو عليه باش يشد الفورمة ديال المول ثم نقلبوه في طبق التقديم و ندورو بيه اللحم مع جناب الطبق و نديرو المريقة خاترة فوق اللحم و يقدم الطبق كيجي هائل في المنظر و المذاق حسب صاحبة الوصفة