المقادير :
4 بيضات
كاس متوسط سنيدة
كاس متوسط زيت
كاس متوسط عصير برتفال
2خمارات
2 فاني
2 كيسان ونصف طحين
تفاحة و بنانة و 6حبات فريز
عصير 2 برتقالات للسقي
2 معالق كبار مربى+ ملعقة كبيرة ماء لدهن الكيك
قبل ما نبدا تحضير الكيك ندهن مول داير مسدود بالزبدة ونرشه بالطحين ونديروه فالفريكو ثم نشعل الفران يسخن
نقشرو التفاحة ونقطعها شرائح ونقطعو البنانة دوائر ونديرو عليهم شوية عصيرالحامض ونقطع الفريز على جوج ثم نقطعوه شرائح ونديروه فوق ورق نشاف
طريقة تحضيرالكيك
نطرب البيض مع سنيدة مزيان بالباطور حتى يبياض شوية ثم نضيف الزيت شوية بشوية مع التطراب ثم الليمون شوية بشوية واحنا كنطرب ثم فاني ونخلط مزيان ثم نوقف الباطور ونغربل الطحين والخمارة فوق الخليط ونخلط بملعقة العود في اتجاه واحد ثم نصب الخليط فالمول ونستف فوقه الفواكه غدي نديرو دورة ديال التفاح (ماشي نغطيو الخليط كامل ولكن غير سطر واحد )ثم دورة ديال البنان ثم دورة ديال الفريز والوسط نزينوه بما تبقى من الفواكه اللي عندنا يعني غدي تكون عندنا طبقة واحدة من الفواكه المشكلة ثم ندخل المول للفران يطيب من التحت حتى يشد فراسو ثم يتحمر من الفوق ومنين نخرجوه نخليوه خمس دقائق ثم نديروه فوق شبكة ديال الحديد ونتكوه براس الموس او الفورشيت ونسقيوه بعصير 2 برتقالات ثم ندهن الوجه بالسيرو ديال المربى و الماء اللي غلينا شوية فوق النار ثم نديرو الكيك فالثلاجة يبرد